O presidente da Xunta, Alfonso Rueda, anunciou a posta en marcha dunha nova liña de axudas para pemes coas que “promover proxectos empresariais de certa envergadura” polo volume de investimento ou polos postos de traballo que van crear. “Destinaranse 30 M€ ata 2026 co obxectivo de beneficiar a unha vintena de iniciativas”, dixo o titular do Goberno galego.

A finalidade deste novo programa “é seguir dinamizando a economía e dando un primer empurrón a este tipo de iniciativas”, segundo salientou o presidente.

A convocatoria, tal e como explicou Rueda, inclúe dous campos de actuación. Dun lado, atenderanse  aqueles proxectos que conten cun investimento “de entre 800.000 e 10.000.000 de euros” en activos fixos tanxibles e intanxibles, obra civil, bens de equipamento, aplicacións informáticas ou adquisición de activos dun establecemento.

Doutro lado, apoiaranse as iniciativas empresarias de menor investimento, “pero que garantan a creación de 25 empregos indefinidos a tempo completo”.

As achegas cobren ata o 35 % dos investimentos subvencionables ou dos custos salariais de ata 24 meses de todos os novos contratados, no caso das compañías pequenas, e o 25 % nas iniciativas promovidas por empresas medianas.

A liña, dirixida ás pemes pola súa especial capacidade para xerar postos de traballo, busca facilitar así o impulso de proxectos de creación de novos establecementos, de ampliación da capacidade dos existentes e de diversificación ou de cambios dos procesos de produción.

A convocatoria, en concorrencia non competitiva, manterá aberto o prazo de presentación de solicitudes desde o día 22 de xaneiro ata o 30 de setembro de 2024.

Con este programa innovador a Xunta aspira a favorecer a dinamización da actividade económica en Galicia e potenciar o mantemento e a creación de emprego, a través do desenvolvemento e mellora das empresas existentes, e coa creación e posta en marcha de novas iniciativas empresariais.