A partir deste ano, a Deputación de Pontevedra pon á disposición dos 46 concellos de menos de 20.000 habitantes adheridos ao CAAN (Centro de Acollida e Protección Animal de Armenteira) o servizo de esterilización de gatos procedentes de colonias felinas debidamente establecidas legalmente. Luis López, presidente da institución provincial, anunciou en rolda de prensa que se enviará unha carta aos alcaldes e alcaldesas para informar sobre este novo servizo e os pasos a seguir para solicitalo.

Até agora, como explicou o presidente provincial, a colaboración da Deputación, a través do CAAN, limitábase á axuda na redacción dos plans de xestión de colonias felinas. Coa introdución deste novo servizo, a Deputación amplía as prestacións, ofrecendo apoio aos gobernos locais para cumprir coa Lei que obriga á xestión das colonias felinas, incluíndo a identificación, esterilización, vacinación e desparasitación dos animais que as conforman.

"Os recursos económicos e humanos dos concellos, sobre todo os pequenos, son limitados. Por iso, o noso obxectivo é axudalos, neste caso especialmente, para cumprir cunha obriga legal", asegurou Luis López. Deste xeito, os concellos interesados deberán presentar a solicitude de esterilización para gatos recollidos nas colonias felinas, xunto cunha memoria que especifique o número de colonias no seu termo municipal e os animais presentes en cada unha delas.

A colaboración da Deputación será prestada a través dos servizos veterinarios do CAAN. O concello deberá contactar co centro indicando o número de gatos que desexa esterilizar. Por razóns de operatividade, o número máximo de felinos que se poderán recoller por día será de 10, e as solicitudes serán atendidas por estrita orde de chegada. Os concellos deberán recoller os animais no prazo máximo de 36 horas desde a súa chegada ao CAAN, xunto cun certificado de esterilización que detallará as intervencións realizadas, así como os coidados e tratamentos recomendados.

Este novo servizo enmárcase no novo contrato adxudicado a Tragsa, a través do cal a Deputación investirá 1,4 millóns de euros ata finais de 2025. O contrato inclúe a retirada de cans, xestión da entrega de animais, e esterilización de gatos en colonias felinas dos concellos provinciais con menos de 20.000 habitantes. Tamén abrangue tarefas de mantemento e coidado dos animais recollidos, así como identificación, revisión sanitaria, esterilización, asistencia veterinaria e xestión de adopcións de animais declarados abandonados.

A través do CAAN, desenvólvense campañas de adopción, formación a técnicos e autoridades municipais, inicio e seguimento de expedientes de protección animal e animais potencialmente perigosos, estudos e informes, así como colaboración en investigacións sobre saúde e benestar animal.