O presidente do Goberno galego, Alfonso Rueda, anunciou que arredor dunhas 37.000 persoas que perciben en Galicia unha pensión non contributiva recibirán o complemento extraordinario da Administración autonómico, tras aprobalo así o Consello da Xunta celebrado hoxe. Trátase dun completo que procura mellorar a capacidade adquisitiva das galegas e galegos que non puideron cotizar á seguridade social. 

Deste xeito, segundo precisou, o Goberno galego achegará a todas elas unha axuda extraordinaria de 218 euros, “abonado de oficio” nun único pagamento anual que recibirán de maneira automática nas súas contas bancarias sen necesidade de que o soliciten e sen levar a cabo ningún trámite adicional. 

Rueda apuntou que a Administración autonómica destina algo máis de 8 millóns de euros a este complemento, que está dirixido a beneficiarios de pensións de xubilación e invalidez nas súas modalidades non contributivas, do fondo nacional de asistencia social e do subsidio de garantía de ingresos mínimos.  

Ademais, o presidente galego destacou que “se consolida” o incremento do 5,8 % na contía deste complemento que xa se aplicou o ano pasado e adiantase de novo o seu pagamento ao mes de febreiro, xa que anteriormente estas axudas pagábanse a finais de cada ano.

Rueda puxo en valor que Galicia é unha das “poucas comunidades autónomas” que mantivo “xeito ininterrompido” durante os últimos 16 anos esta axuda extraordinaria que non é obrigatoria, pois son os propios executivos autonómicos os que deciden mantela.