A candidata do Bloque Nacionalista Galego (BNG) á Presidencia, Ana Pontón, compartiu coa directiva da Confederación de Empresarios de Galiza (CEG) as claves económicas do proxecto de goberno da súa formación. Pontón destacou a aposta clara polo fomento da innovación, a creación de máis industria e o impulso dos sectores produtivos tradicionais.

Entre as medidas propostas, Pontón subliñou o Plan de fomento da actividade tecnolóxica e industrial, co obxectivo de incrementar en oito puntos o peso da industria no PIB e xerar 12.000 novos empregos ata 2030. O Bloque tamén pretende converter a economía galega nunha "economía do coñecemento" a través dun Pacto Galego pola Ciencia e a Innovación, destinando o 3% do PIB á ciencia no horizonte temporal do 2030.

Ademais, a candidata comprometeuse a axilizar a dotación de solo empresarial nas áreas máis dinámicas do País e a facelo a prezos competitivos para atraer investimentos. Pontón tamén anunciou medidas específicas de apoio ao sector pesqueiro e agropecuario, así como a creación dun novo modelo enerxético ao servizo da sociedade.

Pontón enfatizou a importancia do cambio e apelou á cidadanía a votar "con ilusión" para construír unha Galiza máis competitiva e sostible. A candidata expresou optimismo ante a receptividade da sociedade ao proxecto do BNG e destacou a posibilidade de contar cunha presidenta nacionalista por primeira vez na historia do país.