Onte martes a alcaldesa de Mos, Nidia Arévalo, e a concelleira de Política Social mosense, Sara Cebreiro, presentaron a primeira Escola de Nais e Pais do Concello de Mos. A presentación realizouse na Escola Infantil A Galiña Azul da Porteliña, acompañadas polas mestras promotoras da iniciativa, Paula Jorge e Cristina Pollán.

Durante o evento, Paula Jorge explicou que o proxecto xurdiu da observación das educadoras infantís, que detectaron a necesidade de proporcionar ás familias espazos para reflexionar sobre a ardua tarefa de ser nais e pais. Co lema "Familias Activas", as coordinadoras buscan axudar e orientar ás familias no seu labor educativo.

Un dos obxectivos principais desta iniciativa é promover a igualdade de xénero na educación. As actividades propostas abordan a igualdade de forma transversal, creando un espazo onde as mulleres poidan expresarse libremente sobre a crianza e os roles tradicionais asignados ás nais.

A Escola de Nais e Pais consta de reunións mensuais, activas e participativas, nas que se tratan temas que preocupan ás familias, coa colaboración de profesionais expertos. Estas sesións fan especial fincapé na igualdade de xénero desde a primeira infancia.

"Familias Activas" pretende ser unha ferramenta que proporcione ás familias a información e formación necesarias, sempre coa colaboración de profesionais obxectivos e comprometidos coa importancia da educación dos adultos para un futuro mellor.

Os obxectivos do programa inclúen:

• Promover a igualdade de xénero en todas as charlas.
• Reflexionar sobre situacións cotiás de desigualdade de xénero.
• Favorecer a relación familiar e facilitar a comunicación.
• Dotar ás nais e pais de recursos e habilidades.
• Detectar problemas de forma precoz.
• Promover a participación activa no grupo.

O proxecto tamén busca prestar un servizo de apoio ás familias, axudándolles a traballar tanto a función educativa como a función socializadora, superando situacións de necesidade e risco social. É unha iniciativa preventiva que contribúe a cambiar condutas e adquirir pautas dinámicas no ámbito familiar. A metodoloxía desta Escola ten como obxectivo final axudar aos membros do grupo a construír os seus propios coñecementos para resolver os problemas da vida cotiá.

A Escola de Nais e Pais céntrase en resolver dúbidas das familias con nenos e nenas na primeira infancia. O obxectivo é crear un espazo de expresión para as familias, onde expertos na materia lles axuden a reflexionar sobre diferentes formas de afrontar a educación, nun ambiente distendido e cun aforo limitado a 20 persoas.

As charlas programadas inclúen:

• A Educación Emocional, con Naiara González.
• Os límites e As perrenchas, con Ana Couto.
• Xogos e Xoguetes para a Igualdade, con Eva Docampo Vila.
• A alimentación na infancia, con Encarna Villanueva.
• Para que educar en igualdade, con Eva Docampo Vila.
• O Xogo e a súa importancia na educación, con Naiara González.
• Abordaxe da educación afectivo-sexual desde a primeira infancia, con Eva Docampo Vila.
• A mellor versión de ti mesma/o para os teus fillos, con Ana Couto.
• As vacacións e integración na escola, co Gabinete de Educación Temperá do Concello de Mos.

A próxima charla será no Pazo de Mos o vindeiro 27 de maio ás 18.00 horas, con entrada de balde. Será impartida por Ana Couto e tratará sobre os límites e a disciplina positiva.