O Diario Oficial de Galicia publica  a ampliación de 350.000 euros da convocatoria de axudas para a adquisición de taxis adaptados á mobilidade reducida e de emisións cero ou categoría ECO. Esta ampliación súmase aos 500.000 euros da orde publicada en novembro pasado, cuxo crédito xa se esgotou.

Os titulares de autorizacións administrativas de transporte vixentes, documentadas en tarxetas da serie VT-N, poden solicitar estas axudas ata o 14 de outubro. Os incentivos inclúen 10.000 euros para vehículos adaptados á mobilidade reducida, 4.000 euros para coches de emisións cero e 1.000 euros para taxis ECO.

Os vehículos novos adquiridos antes do 31 de outubro de 2024 poden optar ás subvencións, incluíndo aqueles xa adquiridos que manteñan o compromiso de actividade durante cinco anos. Os beneficiarios deben adscribir o vehículo á autorización de transporte da serie VT-N antes do 1 de xullo de 2025.

O obxectivo desta iniciativa é fomentar a inclusión social no sector do taxi e contribuír á loita contra o cambio climático mediante a adquisición de vehículos menos contaminantes. O ano pasado, con 900.000 euros, a Xunta apoiou a compra de 27 vehículos adaptados, 146 taxis de baixas emisións e 8 vehículos de emisións cero. Estas axudas benefician un sector que emprega a preto de 3.500 familias en Galicia e garante a mobilidade esencial. Actualmente, existen 265 taxis adaptados na comunidade: 85 na provincia da Coruña, 80 en Lugo, 31 en Ourense e 69 en Pontevedra.