A concelleira de Cultura mosense, Sara Cebreiro, e a alcaldesa de Mos, Nidia Arévalo, xunto con outros membros da Corporación Municipal entregaron hoxe na Biblioteca os premios ós vencedores do Concurso Infantil de Postais de Nadal que resultaron ser, na Categoría I de 3 a 5 anos, Íker Besada Rodríguez de 3 anos de idade; na Categoría II de 6 a 8 anos, Lucía Sousa González de 8 anos de idade; e na Categoría III, de 9 a 12 anos, Gael de la Iglesia Domínguez de 9 anos de idade. Ademais dos premios das tres categorías existentes, este ano incluíronse no concurso dúas mencións especiais, unha por orixinalidade, acadada por Martiño Romero Alonso de 5 anos; e outra á mellor mensaxe, que recaeu na nena Andrea Pérez Vilaboa de 12 anos de idade. Os cinco recibiron como premio un lote de libros e material escolar máis un diploma. O acto de entrega de premios consistiu nun evento-espectáculo de animación.

En total participaron na presente edición do Concurso de Postais de Nadal 55 nenos e nenas repartidos do seguinte xeito segundo as categorías existentes: 13 participantes na Categoría I de 3 a 5 anos, 20 participantes na Categoría II de 6 a 8 anos, e 22 participantes na Categoría III de 9 a 12 anos.

A edil de Cultura do Concello de Mos, Sara Cebreiro, declaraba esta mañá sobre o concurso que “dende a Biblioteca Municipal quixemos aproveitar esta época tan marabillosa do ano para potenciar a creatividade dos nosos escolares e sobre todo fomentar a lectura e a escritura nos nosos cativos poñendo en marcha o tradicional Concurso de Postais de Nadal Concello de Mos”, explicou a concelleira Cebreiro.

As características que debían cumprir as postais dos nenos participantes para poder entrar en concurso foron as seguintes: podía ser en galego ou en castelán, podíaselle engadir ademais de debuxo todo tipo de ilustracións, fotos, etc.; podíanse empregar os materiais que se desexasen: ceras, lapis, bolígrafos, rotuladores, telas, recortes, etc.; o tamaño non podía exceder dun folio tamaño A4 por un só lado, e a medida mínima era de medio folio A4 por un só lado; en relación ao tema, os pequenos podían engadir tamén unha frase na postal, que podía ser un desexo que non fora de carácter material ou expresando que lles gustaría que cambiase no seu contorno cotián, dos amigos/as, familiares, na escola, dos pais, etc.; e, por último, a postal debía ser obra do/a propio/a neno/a, que debía incluir ao final, como mínimo, o seu nome, idade, enderezo e teléfono de contacto (só se aceptou unha postal por persoa).

O xurado do concurso estivo composto por diferentes técnicos/as municipais dos departamentos de Cultural e Benestar Social, que valoraron a calidade e orixinalidade das postais, así como os seus valores positivos; descartando aquelas nas que se percibira a intervención directa dun adulto.