A Axencia Española de Medicamentos e Produtos Sanitarios (AEMPS), seguindo a recomendación da Axencia Europea do Medicamento, procedeu a suspender a autorización de comercialización de 29 medicamentos xenéricos. Deixarán polo tanto de estar dispoñibles nas farmacias españolas.

Fallos nos ensaios clínicos
Nunha nota informativa recente a AEMPS alega que deu este paso porque existen dúbidas sobre a integridade dos datos xerados nos estudos clínicos que se levaron a cabo nos laboratorios GVK Biosciences. Eses ensaios foron os que levaron a conceder a devandita autorización. De feito encontráronse probas de que GVK levaba tempo incumprindo as normas de boas prácticas clínicas, manipulando os resultados dos electrocardiogramas.
A lista completa dos 29 xenéricos afectados pódea consultar na nota informativa da AEMPS. Entre eles encóntranse, por exemplo, un fármaco para frear os vómitos (Metoclopramida Accord), outro para a osteoporose (Ácido Alendrónico Semanal Ranbaxy), para a demencia (Donepezilo), dous antihipertensivos (Irbesartán,Valsartán/Hidroclorotiazida ), un antidiabético (Repaglinida), varios antihistamínicos (Desloratadina e Ebastina Brown), un antidepresivo (Escitalopram), un antiácido (Esomeprazol Mylan)...

Hai alternativas no mercado
A AEMPS aclara que os pacientes que están a ser tratados con calquera dos medicamentos afectados non teñen necesidade de interromper o tratamento, dado que ata a data non se demostrou que o problema afecte á súa seguridade ou eficacia. Ademais, no caso español, para todos estes medicamentos hai alternativas dispoñible no mercado.

Non obstante, OCU considera que, aínda que non exista un risco probado, se deberían deixar de vender (e comprar) inmediatamente. De igual xeito, os pacientes que así o queiran, deberían ter dereito a que se lles substitúan aqueles fármacos desta lista polas súas alternativas, sen ningún custo engadido.

Por iso OCU solicita ás autoridades sanitarias (ao Ministerio e ás Consellarías de Sanidade das comunidades autónomas) que habiliten e comuniquen á poboación un sistema áxil de devolución e substitución dos medicamentos afectados polo correcto xenérico equivalente dispoñible a todo paciente que así o requira.