Co obxectivo de sensibilizar os cidadáns e informar sobre a que é a enfermidade crónica intestinal con máis incidencia en España, a Enfermidade Celíaca, as instalacións do Obradoiro de Emprego "Porremprego II" acollerán este mércores a conferencia "A enfermidade celíaca e como vivir sen glute", impartida por María Teresa García e Mercedes Rodríguez, da Asociación de Celíacos de Galicia.

Este relatorio, contará coa asistencia de todos os alumnos, o equipo técnico e o equipo docente do Obradoiro de Emprego do Concello do Porriño. O obradoiro "Porremprego II", impulsa estas accións de divulgación continuando coa liña de actividades lúdico-educativas que vén desenvolvendo este último mes a través dos diferentes "Obradoiros de Cociña" con diferentes centros educativos do municipio.

A charla, que se celebrará a partir das 12:00 horas no Multicentro de Torneiros, estará aberta a todo aquel que queira coñecer un pouco máis sobre esta enfermidade e as súas consecuencias.