O Partido Popular de Salceda de Caselas congratúlase unha vez máis das achegas da Deputación de Pontevedra en beneficio do municipio e dos seus veciños. “Grazas ás subvencións e axudas do ente provincial estanse a levar a cabo obras moi demandadas pola cidadanía, así como tamén a posta en marcha de accións formativas de gran proveito”, sinala o presidente e concelleiro do PP local, Santiago Rodríguez Davila.

Precisamente Rodríguez Davila e o tamén concelleiro popular Joaquín Núñez acompañaron á deputada Marta Iglesias na súa última visita a Salceda para comprobar o estado de dúas obras executadas con partidas procedentes da Deputación, así como saudar e compartir impresión cos participantes nun curso de poda realizado na Asociación de Veciños Caselas, enmarcado no programa “Ti tamén contas”.

As obras obxecto de visita foron, por unha parte, a mellora no cemiterio de San Xurxo, onde se construíu unha beirarrúa de acceso ao mesmo, e, por outro lado, a mellora da traída de augas de San Esteban de Budiño coa instalación dunha nova acometida feita polo colectivo de usuarios.