O Pleno de Salceda de Caselas ven de debater en sesión extraordinaria a eliminación, solicitada polo Partido Popular do municipio, do Carril-Bici que se está a construír na EP2501 por parte da Deputación Provincial de Pontevedra.

O proxecto foi aprobado en Pleno pola unanimidade da corporación municipal, Non Adscritos, PSOE e Partido Popular, dentro do Plan de Obras e Servizos 2013 da Deputación o 2 de setembro de 2013.

Tras as queixas recibidas por un grupo de veciños, agora o PP ven de solicitar a retirada do mesmo, cuestión que foi debatida pero non votada, xa que non é competencia do Pleno, tal e como indica o informe do Secretario Municipal.

Marcos Besada, Alcalde de Salceda califica de “irresponsabilidade e neglixencia do Partido Popular, que aposta por destruír unha obra de referencia no obxectivo de humanizar e mellorar a mobilidade  das persoas” asegura nun comunicado de prensa o rexedor.