Este domingo 22 de marzo a partir das 17:00 h. no Adro de Peitieiros, no que permanecerá instalada unha carpa, o Centro Cultural e Veciñal, en colaboración coa Comisión de Festas organizan un Serán ao que convida a todos os grupos e a todas as persoas que o desexen. A festa rematará cunha chocolatada para as e os participantes.

O motivo que levou ao CCV de Peitieiros a organizar este serán en colaboración coa Comisión de Festas foi o de conmemorar o día internacional da Muller cunha actividade festiva. Por iso este serán brindará unha homenaxe ás pandeireteiras, simbolizando nelas a importancia do papel da muller na transmisión da nosa música en particular e da nosa cultura en xeral, visibilizándoas e dándolles o protagonismo que merecen. E para facelo convidan a participar ás pandeireteiras, gaiteiros, e todo tipo de formacións tradicionais.