A alcaldesa de Mos, Nidia Arévalo, e o concelleiro mosense Camilo Augusto informaron o pasado venres de que comezou a execución das obras de construcción de novos nichos, “moi necesarios dada a gran demanda existente, no Cemiterio Municipal de Mos”. Estanse a acometer novos nichos en tres zonas habilitadas para tal fin no interior do cemiterio, de xeito que se crearán un total de 44 nichos a maiores dos xa existentes.

Cada panteón constará de 4 bocas e un cinceiro como aproveitamento de zonas en desuso e anulación de escaleiras traseiras, cumprindo así coa demanda de numerosos veciños da localidade e da parroquia de Mos.

As obras, ademais da construcción dos nichos, contemplan tamén a mellora da impermeabilización superior de tódolos panteóns e a optimización da seguridade no acceso ó cemiterio. Estes últimos traballos consisten na apertura dunha gran entrada lateral que comunique directamente co aparcadoiro do cemiterio, evitando así o tránsito a pé de persoas que se dirixen á entrada principal do camposanto pola estrada Nacional 550, xa que iso supón un gran perigo para os peóns.

A concesión dos novos nichos é por 50 anos prorrogables por outros 10 anos máis. Foron moitos os veciños interesados en optar a unha destas concesións, que no momento da subasta foron todas solicitadas en moi pouco espazo de tempo.

Deste xeito, dende o Concello de Mos preténdese que unha zona de enorme respecto para os veciños e veciñas mosenses, como é o cemiterio, se atope nas máis óptimas condicións posibles e que todos os habitantes do municipio que así o desexen e o precisen poidan dispoñer do seu espazo nel.