Os Bolechas presentarán o seu libro Os Bolechas van a Mos o vindeiro domingo, 19 de abril, ás 18.00 horas na Carballeira de Santiaguiño, parroquia de Guizán; e en caso de mal tempo a presentación trasladaríase ó Multiusos das Pozas (Petelos).

Os Bolechas naceron da man do ilustrador Pepe Carreiro e convertíronse nun fenómeno de masas. Son seis irmáns máis un can que viviron toda clase de aventuras por Galicia e que nesta ocasión van visitar Mos con motivo da celebración do Día do Libro que se conmemora o 23 de abril.

A actividade dos Bolechas non será a única da programación do Día do Libro 2015,  xa que durante a semana do 20 ao 26  de abril todos os/as socios/as da Biblioteca Municipal de Mos poderán participar nun intercambio de libros.

Ademais o propio día 23 tódolos/as socios/as que collan libros en préstamo participarán no sorteo dun lote de libros.

As aventuras dos irmáns Bolechas chegarán o domingo dia 19 á Carballeira de Santiaguiño, onde todos os rapaces coñecerán o novo libro dos seus pequenos heroes. Os Bolechas  Carlos, as xemelgas Pili e Loli, Braulio, Sonia e Tatá, acompañados todos do seu inseparable husky siberiano Chispa, presentarán nesta ocasión o seu libro Os Bolechas van a Mos,  unha fermosa e divertida aventura que acontece no Camiño de Santiago ao seu paso por Mos.