A codeína é un medicamento que se utiliza para o tratamento da dor leve ou moderado e para a tose improdutiva, que unha vez inxerida e metabolizada se converte en morfina.

Cando isto acontece, uns altos niveis de morfina no organismo poderían chegar a causar problemas para respirar.
En nenos, esta transformación de codeína a morfina é moi variable e bastante impredicible. Por iso, a Aemps acordou prohibir o uso de codeína nos seguintes supostos: nenos menores de 12 anos; calquera paciente no que se comprobase que metaboliza de xeito ultrarrápido a codeína en morfina, derivando así en altos niveis en sangue desta substancia e, por conseguinte, que se expoña a un maior risco de intoxicación por morfina; mulleres durante a lactación, debido ao risco grave de intoxicación para o lactante se a nai metabolizara a codeína de xeito ultrarrápido.

Ademais, a Aemps desaconsella tamén a codeína para pacientes de 12 a 18 anos que teñan problemas respiratorios debido a trastornos neuromusculares, enfermidade respiratoria ou cardíaca grave, infeccións pulmonares, trauma múltiple ou pacientes xa sometidos a procedementos cirúrxicos extensos.

O mel como alternativa
Á marxe dos problemas de seguridade da codeína, tampouco se conseguiu demostrar ata agora que este medicamento sexa eficaz contra a tose en nenos.

Non obstante, si existen algunhas evidencias, que non certezas, de que o mel resulta eficaz no tratamento da tose nocturna atribuída a infeccións do tracto respiratorio superior en nenos maiores dun ano.