A pasada fin de semana deu comezo o programa ‘Mos no Camiño’, de realización do Camiño Portugués a Santiago de Compostela en 5 etapas. A primeira etapa celebrouse o sábado 18 de abril, dende Tui a Mos, contando con 45 participantes. A segunda etapa, Mos-Arcade, levarase a cabo o vindeiro sábado, día 25 de abril, e están inscritas xa nela un total de 50 persoas. Espérase non obstante, continuar aumentando nas próximas 3 etapas, o número de participantes ata chegar ó tope de prazas existentes: 55.

Esta iniciativa vai dirixida a todos os veciños e veciñas mosenses interesados en participar. En todas as etapas os peregrinos participantes contan cun coche de apoio, acompañamento dos Voluntarios de Protección Civil de Mos, avituallamento, servizo de autocar para desprazamentos ata os puntos de partida e regreso a Mos, e comida do último día. O prezo das 5 etapas por persoa é de 15 euros. A hora de partida de todas as etapas é ás 08.30 horas da mañá e todas as etapas realízanse en sábado, agás a terceira etapa que se levará a cabo o venres día 1 de maio.

A primeira etapa foi Tui-Mos o día 18 de abril. A segunda etapa será Mos-Arcade o 25 de abril con regreso en autocar ata o Pazo de Mos sobre as 14.30 horas aproximadamente. A terceira etapa, Arcade-Barro, levarase a cabo o 1 de maio con saída e regreso en autocar dende o Pazo de Mos cunha hora estimada de volta de ó redor das 14.30 horas. A cuarta etapa será de Barro a Padrón o 9 de maio con saída e regreso tamén dende o Pazo de Mos e regreso previsto sobre as 14.30 horas. A quinta e última etapa incluirá o percorrido de Padrón a Santiago con saída e regreso dende o Pazo de Mos e volta contemplada sobre as 19.00 horas da tarde, xa que esta xornada incluirá xantar nun restaurante de Santiago de Compostela e visita á Catedral.