Unha muller faleceu onte a causa dun incendio producido na súa vivenda en Nigrán, na rúa Cansadoura, no lugar de Patos. O lume calcinou por completo a habitación na que se atopaba a falecida no momento no que se iniciou o incendio e, ademais, afectou considerablemente ao resto da vivenda, segundo informaron os efectivos do parque comarcal do Baixo Miño. Ao fío das 21:30 horas de onte, varios particulares alertaron do incendio ao CAE 112 Galicia e indicaron a posibilidade de que houbese persoas no interior da vivenda. De seguido, informouse aos Bombeiros de Baixo Miño, aos axentes da Garda Civil e da Policía Local, ao GES de Val Miñor e a Urxencias Médicas.