O BNG mantén o seu “compromiso de reverter o modelo privatizador aplicado polo PP no Porriño”. A recuperación dos servizos públicos é unha das prioridades do proxecto de goberno nacionalista, que considera “a xestión directa como o mellor antídoto contra a corrupción e como unha oportunidade para crear emprego público de calidade”.

Dende o  Bloque do Porriño explican que realizará “un estudo previo para valorar o estado dos contratos e dos servizos afectados, para proceder a unha progresiva remunicipalización que atenda as necesidades máis urxentes da veciñanza. Os servizos serán xestionados a través dunha Empresa Pública de Servizos, plural e sen carácter lucrativo, que permitirá unha mellor fiscalización e aproveitamento dos recursos”.