Xosé Represas, portavoz e candidato do BNG á Alcaldía de Ponteareas manifestou esta semana que unha das primeiras medidas que tomará, con respecto ao Plan Xeral de Ordenación Municipal, será dar a coñecer ás propostas técnicas de modificación do Plan aos colectivos que presentaron alegacións, antes da aprobación provisional, dando así cumprimento ao acordo do Pleno neste sentido.

O candidato do Bloque considera que “se debe respectar aos 3.000 veciños e veciñas que presentaron alegacións e tratar o urbanísmo coa máxima transparencia como paso previo a lograr o consenso social e político arredor do Plan. Condición necesaria para sacar adiante a planificación que condicionará o desenvolvemento futuro de Ponteareas”.

Represas considera que “o documento que finalmente se aprobe terá cambios moi importantes con respecto ao exposto ao público no verán de 2013. Cambios para mellorar o PXOM e necesarios para incorporar ás alegacións de interese xeral presentadas polos colectivos veciñais e o propio BNG”.

Os nacionalistas consideran “razonables ás demandas do Centro Artístico Sportivo e pensan que é posible acadar un acordo que beneficie a todo o núcleo urbano de Ponteareas e tamén á sociedade para desenvolver os seus fins sociais, deportivos e culturais”.

O BNG tilda de incompetente ao PP e Solla, pola súa incapacidade para sacar adiante o Plan Urbanístico, “en doce anos, Solla, non resolveu nin un só dos problemas importantes de Ponteareas, só irresponsabilidade e falsas promesas, e o PXOM é un bo exemplo diso“ afirmaron os nacionalistas engadíndo “Solla neste tempo non fixo nada e agora só fai campaña electoral”

Por outra parte, Represas convida a Solla a un debate público no auditorio sobre a situación actual de tramitación do PXOM.