A Asociación Ponte Solidario, ante “o rexeite do goberno a súa proposta no Pleno Municipal” ven de impulsar un órgano aberto para tratar temas sociais.

Case dous meses e tres asembleas despois do Pleno Municipal onde se expuxo o Informe de Mínimos, a mobilización por uns mínimos sociais que coordina Ponte Solidario presenta a Mesa Social Aberta. Así o pasado venres 15 de maio, veu a luz un órgano consultivo, “plural e transparente para tratar os temas máis transcendentes da realidade social en Ponteareas”.

A presentación oficial tivo lugar na sala multiusos do Auditorio Reveriano Soutullo, coa presenza de gran parte dos colectivos sociais de Ponteareas e que se manteñen organizados dende o 17M, cando os votos en contra de PP e ACIP rexeitaban a proposta para que a Mesa Social fose unha “ferramenta pública, aberta e de carácter municipal”. Isto é, segundo aseguran dende a Asociación, “unha irresponsabilidade por parte do goberno cando se trata do ámbito social, onde as persoas deberían importar de verdade”.

A mobilización que impulsa este órgano naceu en apoio ó Informe de Mínimos para Ponteareas e continuou traballando despois do Pleno de marzo, onde as aspiracións sociais de Ponte Solidario sufriron un revés en forma de negativa. Ás 2.000 sinaturas que avalaron o documento de mínimos, sumáronse moitos colectivos que formaron parte da mobilización e participarán na Mesa Social Aberta. A PAH, as ANPAS (Pena do Equilibrio, Tea y FANPO), CIG, FestiVal das Brétemas ou o Círculo Feminista son algúns dos colectivos sociais, ademais de todos os partidos políticos con presenza en Ponteareas, a excepción de ACiP e PP, que non responderon á invitación para participar, ó igual que tampouco o fixeron Cruz Vermella, Cáritas ou os Servizos Sociais como principais entidades de axuda social.

O portavoz da Mesa Social Aberta explicou os obxectivos, idiosincrasia e funcionamento do que segundo Ponte Solidario, “esperamos sexa un órgano eficaz que axude a remar na dirección que moitos ponteareáns necesitan”, invitou ademais a outros colectivos e persoas a modo individual a participar neste equipo de traballo, “as asembleas serán abertas, transparentes e sempre mantendo o anonimato das familias axudadas, entre todos construiremos un pobo sen exclusión social”.