Con 2201 votos e 6 concelleiros o partido Movemento Salceda liderado polo actual alcalde, Marcos Besada, foi a formación política máis votada na localidade conseguindo o 43,78% dos votos.

Como segunda forza política na localidade ségueo o Partido Popular de Santiago Rodríguez con 1.795 votos (35,71%) que quedará con cinco edís, perdendo un.

Pola súa banda a Socialista Verónica Tourón conseguía os 722 votos (14,36%) co que logra duplicar o número de concelleiros, polo que contará con dous edís nesta lexislatura.

O Bloque Nacionalista Galego (BNG) obtén 252 votos que non lle alcanzan para ter representación municipal.

Desta forma o pasado 24-M acudían ás urnas un total de 5.136 persoas nunha xornada que transcorría con total normalidade e sen incidencias destacables. Houbo 109 votos nulos e 57 en branco.

Con estes resultados a candidata do PSdG-PSOE Verónica Tourón será a chave para a gobernabilidade do municipio, un goberno que se segue a liña da anterior lexislatura podería volver formarse en coalición con Marcos Besada, esta vez como candidato da nova formación Movemento Salceda.