O alcalde de Ponteareas, Xosé Represas, indicou esta mañá ao interventor do concello que inicie a tramitación oportuna da súa renuncia ao soldo de alcalde, no que constitúe a primeira medida que adopta o rexedor municipal trala súa investidura.

Trátase dunha das promesas electorais realizadas por Represas e que o novo alcalde cumpre así nos seus primeiros días de mandato.

A intención de Represas é aproveitar ese diñeiro para crear unha partida orzamentaria coa que subvencionar a creación de postos de traballo en Ponteareas. A previsión do goberno municipal é aprobar e publicar unha orde de axudas dirixida a incentivar a contratación de traballadores e as iniciativas dos emprendedores.

O novo goberno local “é consciente de que a falta de emprego é un dos principais problemas que afectan aos veciños e as veciñas de Ponteareas. Esta medida vai encamiñada a poñer todos os recursos posibles a prol da creación de oportunidades laborais para os habitantes do municipio”.