A xunta de goberno da Deputación aprobou o pasado venres venres a adxudicación, mediante procedemento aberto, das obras de mellora da seguridade viaria da E.P 2604 Puxeiro-Rebullón á empresa  Prace, servicios e obras S.A por  importe de 213.786 €.

Cun prazo de execución de 2 meses, segundo o proxecto presentado pola empresa adxudicataria, as  obras aprobadas pola Deputación queren corrixir as deficiencias que presenta esta estrada provincial. Vial que soporta unha elevada intensidade de tráfico con áreas de tránsito moi urbanizadas.

Dende a glorieta de Puxeiros, no casco urbano de Mos, ata o Polígono Industrial do Rebullón, a estrada conta con numerosas edificacións en ambas as marxes, beirarrúas e pasos de peóns, e presenta un estado do firme notablemente deteriorado, mentres que no resto da estrada non hai apenas edificacións e o estado do firme é aceptable.

Renovación da capa de rodadura

Nos treitos máis urbanizados (desde a rotonda de Puxeiros ata o acceso ao polígono de Rebullón e na zona da glorieta de Rebullón), que son os que presentan máis danos, levantarase toda a actual pavimentación e aplicarase unha nova capa de rodadura.

Tamén se  renovará e completará a sinalización horizontal e vertical, limitando o tráfico a 50 km/h nas zonas de travesía con beiravías e a 30 km/h nas zonas urbanas.

Beirarrúas e aparcamentos

Estenderanse as beirarrúas na marxe esquerda da estrada ao pasar a ponte da A-55, xa que na actualidade carece de beirarrúas co conseguinte perigo para os peóns. Ademais dotarase este tramo de varandas e repararanse as lousas levantadas ou rotas.

Así mesmo, os traballos tamén inclúen a creación dunha área de aparcamento no contorno do Hospital de Rebullón, e instalaranse 3 pasos de peóns elevados en Puxeiros, fronte do Colexio Lar e do hospital.

Finalmente, substituirase a rede de abastecemento municipal que transcorre entre as glorietas do Rebullón e de Puxeiros, na actualidade moi deteriorada e con continuas roturas que afectan ao pavimento.