A Consellería de Sanidade, a través dos seus respectivos departamentos territoriais, realiza a vixilancia sanitaria das piscinas de toda a comunidade galega.

Dende a Dirección Xeral de Innovación e Xestión da Saúde Pública lémbrase aos usuarios de piscinas de uso colectivo unha serie de normas para que o desfrute e uso das instalacións non supoña ningún risco para ninguén. Isto é publicado na  páxina web do Sergas (http://www.sergas.es), na área Sanidade Ambiental do apartado Innovación e Xestión da Saúde Pública

Algunhas delas son ducharse antes de mergullarse na auga, para así eliminar o suor, bronceadores e calquera tipo de produto aplicado na pel. É importante utilizar chancletas e nunca entrar ao recinto con calzado de rúa, así como evitar que os máis pequenos corran arredor da piscina, para evitar escorregadas.

Á hora de bañarse, os usuarios deben ser prudentes cando se lancen de cabeza ou se tiren do trampolín, comprobando sempre que non haxa ningún bañista mergullado. Ademais, Sanidade recorda o perigo de bañarse, particularmente en auga fría, se non transcorreron polo menos dúas horas da última comida.

En canto a preservar o medio, é esencial non deixar desperdicios tirados no recinto, e facer uso das papeleiras e recipientes dispoñibles nas inmediacións.

Lémbrase que está prohibida a entrada de animais nas instalacións da piscina, agás os cans guías.

Recomendacións sanitarias

O 11 de outubro de 2013 publicouse o Real decreto 742/2013, do 27 de setembro, polo que se establecen os criterios técnico sanitarios das piscinas, que actualiza a normativa vixente nestas instalacións e inclúe as piscinas unifamiliares e as pertencentes a conxuntos inmobiliarios ou comunidades de veciños, que terán que cumprir algúns dos artigos deste real decreto.

Neste caso Sanidade publicou unhas recomendacións sanitarias que poden consultarse na súa páxina web.