Os membros do Grupo de Intervención Psicolóxica en Emerxencias e Catástrofes (GIPCE), alertados polo persoal do CAE 112 Galicia, estiveron prestando apoio e atención especializada á familia do menor que desapareceu onte no Río Miño cando nadaba nunha praia fluvial en Goián, Tomiño.

Os equipos de rescate estiveron inspeccionando, sen éxito, a zona ata ben entrada a madrugada. Ás sete desta mañá, os efectivos de Protección Civil da localidade volveron ó río para continuar cos rastrexos.

Ó longo da xornada se sumaban outros equipos. Segundo relataron as testemuñas do suceso, o rapaz se bañaba xunto con outro mozo de 24 anos, que foi rescatado de inmediato por uns veciños e que se atopa en perfecto estado de saúde. Todo parece indicar que os rapaces foron arrastrados pola corrente do río. Durante os primeiros minutos, os particulares que conseguiron pór a salvo ó adulto aseguraron que tiveron ó menor á vista, pero logo lle perderon o rastro. Tras contactaren co 112 ás 16:55 horas de onte, a Axencia Galega de Emerxencias (AXEGA), a través do CAE, activou o protocolo de actuación en caso de accidente en zona transfronteiriza, ARIEM 112. Así, ó operativo de busca se uniron equipos de rescate de Portugal. Desde onte, traballaron na zona Bombeiros do Baixo Miño, que dobraron efectivos; membros do GES da Guarda, axentes de Protección Civil de Tomiño e a tripulación do Pesca I, do Servizo de Gardacostas de Galicia. Da outra beira do Miño, do país veciño, chegaron varios mergulladores pertencentes ao parque de bombeiros de Viana do Castelo e dos Bombeiros de Vilanova da Cerveira, que, a bordo dunha embarcación, fixeron rastrexos pola beira portuguesa. 

Finalmente o quipo de bombeiros da localidade de Caminha atopou o cadáver do mozo a uns 150  metros da ponte internacional.

O xuiz procedía ao levantamento do cadáver sobre as 13.00 horas de hoxe.