O Club de Natación informou da súa participación nos Campionatos Galegos Absolutos obtendo uns excelentes resultados con dous metais obtidos pola nadadora Alicia Davila Silva.

A pasada fin de semana celebrouse o Campionato Galego Absoluto de Natación na piscina do Complexo Deportivo Rías Sur, Pontevedra. Nesta competición a nadadora mosense Alicia Davila do Club de Natación Mos realizou unha actuación maxistral conseguindo unha medalla de prata en 50 metros braza e unha medalla de bronce en 100 metros braza. Alicia, nadadora habitual do Campionato Galego e que xa participou nos Campionatos de España, é para o Club de Natación Mos un exemplo a seguir para os mozos e mozas mosenses, demostrando que o deporte forma unha parte importantísima na formación da infancia e da mocidade, segundo declarou o presidente do Club, Roberto Carlos Rodríguez Dasilva.

O presidente lembrou tamén que o Club de Natación Mos compite ademais nas Copa de Clubs e Liga Benxamín e Alevín, e dende fai xa once anos ven traballando por crear alternativas no deporte.

Os interesados en obter máis información sobre o Club ou en pasar a formar parte do mesmo poden poñerse en contacto telefónico co presidente no seguinte número 637764368.