Unha persoa tivo que ser excarcerada tras quedar atrapada no interior da furgoneta que conducía en Vigo. O accidente tivo lugar na estrada de Camposanco, na parroquia de San Salvador de Coruxo. Os efectivos do parque municipal de Vigo, alertados polo 112 Galicia, liberaron ao ocupante do vehículo, que resultou ferido de consideración. O CAE 112 Galicia tivo constancia do accidente pasados uns minutos das 19:30 horas da tarde de onte, grazas á chamada dun particular. Así, requiriuse a presenza de Urxencias Médicas, dos efectivos de Protección Civil de Vigo e dos axentes da Policía Local, ademais dos medios de rescate.