O Partido Popular de Salceda de Caselas impugnará, a través dun recurso contenciosos administrativo, a votación realizada no pleno no que se aprobaron as dedicacións do alcalde -13 de xullo-, concelleiros e persoal de confianza por un importe de 160.500 euros. “E é que, independentemente de que consideramos un gasto excesivo para os tempos que corren, o proceso de votación non se desenvolveu correctamente, pois a corporación municipal non estaba constituída ao cen por cen faltando un concelleiro do PSOE e ademais na terceira quenda de votación, cando o alcalde desfai o empate a seis co seu voto de calidade, este non alzou a man como legalmente debería facer”, sinala o presidente local do PP e concelleiro, Santiago Rodríguez Davila.

“O alcalde escúdase dicindo que trala dimisión do número 2 socialista contaba con 10 días para convocar o pleno extraordinario onde se dera conta da renuncia, pero non explica por qué aproveita a ocasión para incluír na mesma sesión a aprobación dos soldos. E é que segundo se recolle no artigo 38 do Regulamento de Organización e Funcionamento das Entidades Locais, trala constitución da corporación non existe un prazo para establecer as dedicacións, si existe un prazo de 30 días para establecer a regularidade dos plenos, as comisións informativas ou a xunta de goberno, pero para aprobar os soldos de alcalde e concelleiros pódese tardar un mes, dous ou tres, non hai un prazo establecido, o que ocorre é que ao alcalde interesáballe a situación na que se atopaba o pleno de onte, onde non estaba representado o cen por cen da veciñanza de Salceda de Caselas dada a ausencia dun concelleiro do PSOE e, consecuentemente, sabía que co seu voto de calidade levaría adiante a súa proposta de salarios” explican nun copmunicado.

Dende o PP pregúntanse que “por que non esperou a que a corporación estivese oficialmente formada, coa nova incorporación dos socialistas, para aprobar as dedicacións? Pois simplemente porque sabía que dese xeito nunca se chegarían a aprobar os soldos. Porque ben sabe tamén que, se hai un acordo previo dos portavoces, este pleno poderíase pospoñer unhas semanas ata a incorporación do novo concelleiro, e así celebrar a sesión como di a lei, con todos os membros da corporación local” aseguran.

Rodríguez Davila subliña que a situación vivida no pleno “lembra a vellos tempos ditatoriais, a falla de rigor, das formas e da dignidade política. En resumo unha acción de covardía política sen precedentes na historia da democracia do noso Concello”.