A Presidenta do Centro Comercial Aberto do Porriño– Morea da Asociacion de Comerciantes e Industriais do Porriño (ACIPOR), Dona Juana Pérez Rodríguez, e a xerente do mesmo, Noelia Conde, compareceron hoxe en rolda de prensa para presentar o Plan de Comunicación do Centro Comercial Aberto Morea que ten como obxectivo promocionar a imaxe do Centro Comercial Aberto “Morea” do Porriño a través da realización dun conxunto de accións enfocadas a difundir un comercio de calidade e competitivo en tres eidos ben diferenciados: o comercio de cercanía e a súa progresiva difusión dixital, a oferta segmentada sectorialmente para por de manifesto a amplitude e calidade da diversa oferta de servizos e productos do CCA, e tamén a potenciar a imaxe do comercio porriñés no eido metropolitano e transfronteirizo e ante o turismo e o Camiño Xacobeo.

Para elo, o CCA Morea, deseñou un conxunto de accións recollidas no Plan de Comunicación no que pretenden marcar unha estratexia de acción coordinada entre todos os socios para acadar o obxectivo de promocionar a imaxe do comercio porriñés e por en valor as súas fortalezas e amplitude de oferta de servizos e productos. Asimesmo, ademáis de potenciar as súas ferramentas dixitais e redes sociais (páxina web e paxina de  Facebook CCA Morea e a nova conta de Twitter @ccamorea_acipor) estableceu un calendario de accións a desenvolver nos vindeiros meses co obxectivo de gañar presencia e difundir e promocionar o comercio local.

Juana Pérez: “é un paso máis cara a modernización do noso comercio local”

A presidenta do CCA Morea, Juana Pérez, manifestou que este plan de comunicación “é un paso máis cara a modernización do noso comercio local e na procura de abrirnos ao futuro dixital no que estamos inmersos, a dar tamén importancia a tódolos sectores do CCA Morea, e a tratar de gañar presencia a nivel metropolitano e como concello transfronteirizo co Norte de Portugal de cara a gañar potenciais clientes do nestes nichos de mercado.”