Unha muller de avanzada idade faleceu hoxe en Baiona despois de que a sacaran da auga en estado inconsciente. Médicos e socorristas trataron de reanimala, pero, finalmente, a persoa morreu. Os feitos sucederon ó fío das dúas desta tarde na Praia de Ladeira, en Baiona.

Varios particulares chamaron ó 112 Galicia para pedir axuda. Ninguén tiña claras as circunstancias do falecemento, pois, cando se decataron da muller, xa flotaba na auga e non respondía a estímulos. O persoal do CAE 112 Galicia activou un operativo no que participaron os servizos sanitarios de urxencia, os axentes da Policía Local e da Garda Civil e os membros de Protección Civil de Nigrán.