O Partido Popular de Salceda de Caselas vén de pedir que se retirase un dos puntos que incluía a orde do día do pleno celebrado o pasado venres, solicitude que saíu adiante cos votos das dúas concelleiras socialistas.

Tratábase da aprobación dun recoñecemento extraxudicial de crédito por importe de 69.246,90 euros para pagar facturas de 2014, o terceiro con cargo ao orzamento deste ano a pesar de non existir e aínda traballar co prorrogado de 2014. “E é que o expediente estaba incompleto, non constaba o informe no que se expón de qué partida se saca o diñeiro para pagar esas facturas”, subliña o presidente local do PP e concelleiro, Santiago Rodríguez Davila.

Para o PP “a causa desta situación é a confección dun orzamento irreal no que a previsión de ingresos nunca se cumpre”

Deste xeito, “xa son máis de 330.000 euros o montante total de facturas recoñecidas este ano pero con data do ano pasado, importe que haberá telo en conta xa no vindeiro orzamento. Unha estratexia que emprega o Goberno local para encubrir a súa mala xestión e logo presumir de superávit, cando en realidade sucede todo o contrario, arrastrándose unha débeda de máis de 4 millóns de euros”, sinala Rodríguez Davila.

“A explicación de todo isto está en que deseñan un orzamento totalmente irreal, contemplando uns ingresos que nunca se alcanzan, facendo unhas previsións de IBI e demais impostos que non se cumpren, e por tanto logo non poden compensar os gastos, o que provoca que logo haxa que andar aprobando estes créditos por andar gastando o que non se ten” asegura o concelleiro popular.

“Os populares non son os culpables de que os empresarios ou autónomos que emitiron esas facturas pendentes de pagar, con data de 2014, aínda non cobrasen, os únicos culpables son o alcalde e os seus concelleiros que falsean as contas e inflan un orzamento que ben saben non é real e contratan o que non poden pagar” remata.