A concelleira de Asuntos Sociais , Soledad Girón, acompañada polo concelleiro de Parques e Xardíns, Orlando Márquez, clausurou o campamento urbano de verán “Veciñeando con V”, organizado polo Concello do Porriño.

O campus alcanzou este ano a súa cuarta edición con record de asistencia: máis de 180 nenos de entre 5 e 12 anos participaron nas múltiples actividades programadas durante o mes de xullo e a primeira quincena de agosto. “Este ano por primeira vez permitimos a inscripción semanal e ademáis ampliamos o campamento ao mes de agosto. Foi un éxito rotundo”, destacou Soledad Girón.

O obxectivo do campamento é ofrecer ao nenos “un espazo para desfrutar das súas vacacións de verán ao mesmo tempo que aprenden e socializan con outros nenos”, sinala a concelleira de Asuntos Sociais. O programa do campus incluíu  actividades deportivas e xogos educativos, nos que non faltaron xogos tradicionais: a oca, tres en raia ou a rana; e manualidades con materiais  reciclados.

Na organización do campamento de verán colaboran as escolas deportivas de tenis, balonman e baloncesto, e o Centro Cultural do Porriño.