Catro persoas tiveron que ser atendidas polos servizos sanitarios a causa das queimaduras provocadas pola deflagración dun barco que repostaba na gasolineira do Porto Deportivo de Sanxenxo. As persoas resultaron feridas de gravidade, segundo indicou o persoal de Urxencias Médicas, que, ademais, solicitou a intervención do helicóptero medicalizado con base en Santiago de Compostela.

Na aeronave trasladarán á Unidade de Queimados da Coruña ó ferido máis grave. Os outros tres serán evacuados en ambulancia ó Hospital de Montecelo, en Pontevedra. Pola súa banda, os membros do Servizo Municipal de Emerxencias de Sanxenxo se encargaron de sufocar o lume producido tras a deflagración, agora totalmente extinguido.

Debido a que o barco estaba a repostar na gasolineira do porto cando esbourou, verteuse algo de gasóleo no mar, que, nestes intres, o persoal de Portos de Galicia trata de limpar. Foi un particular quen pediu axuda ó CAE 112 Galicia arredor das 17:40 horas de hoxe. A partir dese momento, o persoal do 112 Galicia solicitou a intervención de Urxencias Médicas, Policía Local, Garda Civil, Bombeiros do Salnés, Servizo Municipal de Emerxencias, Portos de Galicia, Servizo de Gardacostas de Galicia e Salvamento Marítimo.