Ata catro vehículos envorcaron en diferentes puntos da rede viaria galega. Ao fío das oito desta mañá, dous turismos envorcaron na Vía Rápida de Marín a Bueu, á altura da saída número oito, en sentido Bueu. O persoal do CAE 112 Galicia xa ten activado un operativo no que participan Urxencias Médicas, Garda Civil de Tráfico e o servizo de limpeza e mantemento da Consellería do Territorio, que tratarán de retirar os danos e restablecer a seguridade na vía. Tamén, na Estrada, outra condutora perdeu o control do coche que conducía e se saíu da vía. Segundo relataron os efectivos do GES, como os anteriores, o coche envorcou e a muller que ía no interior precisou da axuda do equipo de rescate para poder abandonar o vehículo. Unha vez fóra, a ferida foi evacuada por Urxencias Médicas a un centro hospitalario de Santiago de Compostela. O accidente ocorreu arredor das tres da madrugada na PO-841, no punto quilométrico 17. Por último, un camión cargado con botellas envorcou na N-VI, en Betanzos. Pese a quedar atrapado na cabina do vehículo, o condutor resultou ileso. Iso si, para abandonar o camión, necesitou da axuda dos Bombeiros de Betanzos.

Ademais dos efectivos do parque comarcal, neste caso, os xestores do CAE 112 Galicia pediron a colaboración dos axentes da Garda Civil de Tráfico e do persoal de limpeza e mantemento do Ministerio de Fomento. O accidente dificultou a circulación á altura do punto quilométrico 574 da N-VI, pois o camión quedou atravesado na calzada. O 112 Galicia rexistrou o sinistro pouco despois das oito da tarde de onte.