O persoal sanitario de urxencia trasladou en ambulancia esta tarde a unha persoa que resultou ferida tras sufrir unha saída de vía co vehículo que conducía. O turismo precipitouse por un terraplén duns catro metros de profundidade, nunha zona de difícil acceso. O CAE 112 Galicia solicitou a intervención dos Bombeiros de Pontevedra en canto tivo constancia de que o condutor, e único ocupante do vehículo, podería ter dificultades para saír do turismo. Pese a que non foron necesarios medios de excarceración, os efectivos de rescate si que axudaron á persoa a abandonar o vehículo, xa que non podía saír polos seus propios medios. O accidente tivo lugar na coñecida como Estrada de Rañadoiro, no concello de Pontevedra, na parroquia de Ponte Sampaio, á altura do lugar de Acevedo. O 112 Galicia recibiu a chamada dun particular pasados uns minutos das 16:00 horas desta tarde e, de seguido, informou a Urxencias Médicas, Protección Civil de Pontevedra e forzas da orde.