Os Bombeiros de Ponteareas sufocaron esta tarde un lume que comezou nas rodas da cisterna dun camión que circulaba pola A-52, en dirección Vigo, e que terminou por calcinar practicamente todo o depósito. Por fortuna, a carga –auga salgada- era inocua e ninguén resultou afectado. Tampouco o condutor do camión, que se apresurou en apagar o lume cun extintor e desenganchar a cabeza tractora. Pese a todos os esforzos, a cisterna resultou calcinada e, por mor do incendio, houbo que pechar o carril de circulación en sentido Vigo, á altura do punto quilométrico 296. Ademais, o incendio propagouse polo monte e chegaron a arder 300 metros de terreo.

O lume sorprendeu a varios condutores que naquel intre circulaban pola A-52 e que chamaron ó 112 Galicia. O persoal do Centro de Atención ás Emerxencias puxo en marcha un operativo no que, ademais dos efectivos do parque municipal de Ponteareas, interviron a Garda Civil de Tráfico e o persoal do Distrito Forestal da zona. O CAE 112 Galicia rexistrou o incendio ás 15:30 horas de hoxe.