A Deputación provincial  está notificándolles ás asociacións e agrupacións culturais as axudas concedidas no programa de instrumentos musicais e vestiario. A través deste programa, destinado a financiar a grupos e asociacións musicais da provincia de Pontevedra para adquisición, recuperación e arranxo de instrumental ou vestiario propio, concedéuselles un total de 119.997 euros a 143 asociacións.

A concesión das subvencións realizouse en réxime de concorrencia competitiva. Para a súa adxudicación tivéronse en conta criterios coma a difusión da actividade que realiza a entidade solicitante, o número de persoas que participan, o número de socios e socias da asociación, o orzamento total da actividade ou investimento e a porcentaxe solicitada de financiamento, así como a adecuación das actividades ou investimentos ó interese provincial.