Hoxe luns 5 de outubro chegarán a Galicia tres persoas de  El Salvador, beneficiarios dos proxectos de Cooperación para o Desenvolvemento de Asemblea de Cooperación pola Paz, co obxectivo de facer unha xira pola costa galega para coñecer as boas prácticas de pesca e acuicultura sostible e levarse ideas que poder aplicar no seu país.

Este intercambio de experiencias tamén busca que as persoas que participan nos proxectos de Cooperación que se financian desde Galicia poidan relatar a súa experiencia e por en valor o traballo que se realiza a prol dun desenvolvemento sostible e respetuoso coa natureza gracias a dotación de fondos públicos. A xira está sendo organizada por o Centro Tecnolóxico do Mar (CETMAR) e a ONGD Asemblea de Cooperación pola Paz.

José Martínez, pescador artesanal; Francisca Soriano, xerente dunha cooperativa pesqueira,  e Mauricio Orellana, coordinador do proxecto en El Salvador permanecerán na nosa comunidade ata o día 15 de outubro, 10 días nos que terán unha completa axenda de traballo.

Este luns estarán en Vigo na Feira de Produtos do Mar Conxelados (CONXEMAR) e degustando produtos da terra no posto da Consellería do Medio Rural e pola tarde visitarán a Asociación de Redeiras Baixo Miño Atalaia de A Guarda.

O día 6 coñecerán o Instituto Galego de Formación en Acuicultura (IGAFA) na a Illa de Arousa, así como as instalacións de depuración de Mariscos Veiro. Finalizarán a xornada cunha e a visita ao Taller de Montse Betanzos de elaboración de produtos con conchas en O Grove.

O día 7 coñecerán o mercado de Berbés en Vigo y viaxarán a Cangas e Bueu para ver as súas lonxas. O día 8 acudirán ao porto de Marín, onde visitarán o Centro de Formación A Aixola, unha empresa comercializadora de productos do mar, O Percebeiro, e Rosa dos Ventos, produtores de polbo conxelado. O día 10 achegaranse a Corcubión da man de A Asociación de Armadores e Artes Menores (Asoar-Armega) e a Plataforma Europea de Pescadores Artesanales LIFE que organizarán un encontro con pescadores artesanais da Costa da Morte. Para rematar o día 14 volverán a Cambados a visitar a Cofradía San Antonio y a coñecer de primeira man como funciona o proxecto Guimatur da man das mariscadoras.

Asemblea de Cooperación pola Paz (ACPP Galicia) leva traballando en El Salvador máis de 7 anos en proxectos de desenvolvemento, apostando porque  as persoas e comunidades desprazadas nos anos 90 polo conflito armado interno que viviu o país poidan ser protagonistas do seu propio desenvolvemento sostible, protexer o seu entorno e ter medios de produción e comunicación propios.

Nesta mesma liña de traballo e no marco deste mesmo proxecto de cooperación financiado pola Xunta de Galicia,  o día 4 volven de El Salvador a Galicia tres voluntarios da nosa socia Asociación Galega de Reporteiros Solidarios que estiveron formando a persoal de radios comunitarias de Centroamérica. Nesta viaxe realizouse o primeiro Encontro Centroamericano de Radios Comunitarias, capacitouse a voluntariado de cinco emisoras comunitarias e traballouse con rapaces e rapazas dun instituto en técnicas audiovisuais para que poidan transmitir as súas experiencias á mocidade galega.