O Concello de Ponteareas xa conta cun novo todo terreo, modelo pick up, que será utilizado polo corpo de Protección Civil de Ponteareas e destinado a labores de emerxencia, protección civil e prevención de riscos.

Trátase dunha concesión realizada pola Dirección Xeral de Emerxencias e Interior, órgano dependente da Xunta de Galicia e que recentemente comunicou a adxudicación de equipamentos de emerxencia, en réxime de concorrencia competitiva, para municipios de menos de 50.000 habitantes.

A concelleira de Seguridade Cidadá, Vanesa Fernández, mostrouse moi satisfeita pola “incorporación dun vehículo que axudará a que o corpo de protección civil teña máis medios á súa disposición e que repercutirá, directamente, nunha mellora da seguridade da veciñanza da vila”.

O PP agradecido

O portavoz do PP local explicaba nun comunicado que "este vehículo todoterreo sumase á outra pick-up entregada na anterior lexislatura ao servizo de bombeiros municipal, e agradece á Dirección Xeral a entrega deste vehículo a vez que aproveita para agradecer tamén o traballo diario de todos os voluntarios da Agrupación de Protección Civil de Ponteareas". Así mesmo, Salvador González Solla afirmaba que "con esta nova adquisición o goberno anterior do PP cumpre así o compromiso adquirido no mes de febreiro coa Agrupación Local de Protección Civil de acadar este novo vehículo para o desempeño das súas actividades diarias".