Un total de tres persoas foron evacuadas na tarde de onte polos servizos sanitarios de urxencia ao centro hospitalario de referencia tras resultar afectadas pola inhalación do gas que, probablemente, causou o mal funcionamento dun quentador.

Pasados uns minutos das 19:00 horas de onte, un particular informou ó CAE 112 Galicia do suceso. Indicou que había moito cheiro a gas no edificio da Rúa Ecuador e que había dúas menores afectadas, polo que, dende o Centro de Atención ás Emerxencias, se alertou a Urxencias Médicas e aos Bombeiros da cidade. Unha vez no lugar e feitas as correspondentes medicións –que deron negativas- os membros do parque municipal barallaron a mala combustión do quentador, como a causa mais probable. Os servizos sanitarios confirmaron o traslado de tres persoas ó Hospital. Dende o 112 Galicia tamén se informou a Protección Civil de Vigo e ó persoal da empresa subministradora do gas.