A Presidenta da Deputación de Pontevedra, Carmela Silva, destacou hoxe na inauguración das xornadas do quinto aniversario da Fundación para a Pesca e o Marisqueo (FUNDAMAR) o seu proxecto de igualdade entre mulleres e homes no sector pesqueiro.

Silva participou hoxe na Cooperativa de Armadores de Vigo na inauguración destas xornadas coas que se quere celebrar o quinto aniversario da Fundación, integrada pola propia Cooperativa  e os sindicatos UGT e CC.OO.

Precisamente, "o acordo social" que representa Fundamar polos seus obxectivos comúns para empresarios e traballadores, é o que máis celebrou Carmela Silva  xa que "as administracións  teriamos que reflexarnos en proxectos como este".

A Presidenta destacou o traballo que ben facendo FUNDAMAR  en ámbitos tan importantes para o sector pesqueiro como a seguridade, a formación, o ámbito social e tamén en aspectos medio ambientais "todo co obxetivo de mellorar o sector pesqueiro e marisqueo para que siga a ser un piar da economía da nosa provincia", subliñou Silva.

A este respecto, Carmela Silva non perdeu a oportunidade de voltar a mostrar o seu apoio ao sector do cerco, xa que considera as súas reclamacións de máis cota e mellor reparto "son xustas".  "Dende Vigo vemos con moita sensibilidade este sector porque forma parte da nosa historia pero tamén ten que formar parte do noso futuro", concluíu a Presidenta da Deputación.