A alcaldesa do Porriño comprometeuse, este martes, durante unha visita ao Colexio de Educación Infantil e Primaria Cruz-Budiño, a que o Concello acometería a reforma urxente das principais deficiencias do mesmo.

As máis importantes, como pudo comprobar Eva García de la Torre no percorrido que fixo acompañada pola concelleira de Educación, Soledad Girón, o director do centro, José Luis Freire, a xefa de estudos e a presidenta da Asociación de Nais e Pais de Alumnos (ANPA), son a necesidade de un peche que garanta a seguridade e integridade das rapazas e rapaces; a eliminación das filtracións de auga no pavillón do centro, que xa resultou asolagado en varias ocasións, e o aillamento das aulas de Infantil.

A alcaldesa constatou que, como lle expuxo o director, a Deputación de Pontevedra comprometerá no anterior mandato municipal un orzamento de 25.000 € para o peche do recinto escolar, unha cantidade que, finalmente, non chegou ao Concello porque dende o goberno local non se realizou o proxecto para o mesmo.

Eva García de la Torre, nunha xuntanza que mantivo cos veciños de Budiño hai duas semanas, prometeu que visitaría o colexio, no que na actualidade estudan 114 nenas e nenos, e que “se é por 25.000, mesmo por 35.000 €, o Concello non dubidará en acometer as obras e melloras necesarias para que os alumnos reciban a súa educación en condicións óptimas”.

Nos vindeiros días, comentou Eva García de la Torre aos responsables do centro, o arquitecto municipal achegarase ao mesmo e realizará unha valoración das obras que hai que acometer e a directiva da ANPA do Cruz-Budiño manterá unha xuntanza coa alcaldesa para expor, polo miudo, os seus proxectos e as carencias que entenden que ten este colexio no que, como dixo o seu director, non se fai un mantemento axeitado dende a súa apertura en 1981.