As concellerías de Política Social e Participación Cidadá, dirixidas por Sara Cebreiro e Kely Monzón respectivamente, organizan un curso básico de voluntariado de 12 horas de duración, que terá lugar os vindeiros días 16, 17 e 18 de novembro de 9.30 horas a 13.30 horas no Multiusos do Concello de Mos, para que as persoas que decidan participar en actividades de carácter social, teñan unha formación que lles permita desenvolver unha acción de calidade e útil.

O curso ofrece coñecementos e habilidades para poder colaborar no proxecto  “Mos Axuda”, que comezará a funcionar no mes de decembro, e que abarcará, ademais da xestión e o reparto de alimentos e roupa para as familias sen recursos, tamén o voluntariado en actividades con colectivos en situación de risco, persoas con discapacidade, atención á terceira idade, actividades de reforzo escolar, actividades culturais e xuvenís, medioambientais, e todas aquelas actividades que faciliten a conciliación e a igualdade de xénero, entre outras.

Aquelas persoas que queiran colaborar co seu voluntariado por un municipio mellor, poden inscribirse na OMIX ou no seu teléfono  986 339 404.

Que é “Mos Axuda”

“Mos Axuda” consiste nun plan no que irán da man o Concello cos empresarios, asociacións culturais, deportivas e sociais, Protección Civil e dos voluntarios para implementar as prestacións e Servizos Sociais municipais.

Mediante dito plan potenciarase o Programa de Axudas de Emerxencia Social, dotándoo de maiores recursos económicos, así como habilitando unha partida específica para as Axudas de Emerxencia Social da Infancia (lentes, axudas dentais,...).

Ademais, incluído tamén en “Mos Axuda”, crearase o servizo de Armario e Banco de Alimentos Municipal, brindando deste xeito o apoio ás necesidades sociais e humanas, converténdose este servizo nun referente de axuda ao cidadán en situación de desamparo. Este servizo estará moi apoiado na rede solidaria “Mos Axuda”, ó ser fundamental a colaboración de empresas, entidades/asociacións de carácter local, particulares, etc.

En conclusión, este plan está baseado fundamentalmente na profunda unión, apoio e colaboración entre Concello, empresarios, asociacións culturais, deportivas e sociais, voluntarios de Protección Civil e voluntarios en xeral en beneficio das persoas máis necesitadas da localidade.