Dous atropelos a dous cabalos ocorreron á primeira hora desta mañá na A-52, no punto quilométrico 287, dirección Vigo, á altura do Concello de Salvaterra de Miño. Como consecuencia dos atropelos, un dos condutores implicados resultou ferido, segundo explicou Urxencias Médicas ao CAE 112 Galicia. Ademais, foi preciso cortar un carril á circulación mentres o persoal cualificado, para tal fin, non retiraba os animais da vía. O CAE 112 Galicia pasados uns minutos das 06:30 horas desta mañá, recibía a chamada de dous particulares que informaban do atropelo a dous animais no mesmo punto quilométrico. Así, de seguido, pasouse aviso á Garda Civil de Tráfico e á Policía Local. Tamén informou ó persoal do Concello que, neste intre, se ocupa da retirada dos animais.