Dende o pasado venres, día 6 de novembro, está activa no Campo de Fútbol das Baloutas unha Escola de Fútbol gratuíta para os nenos e nenas de 5 a 10 anos de idade. Este proxecto totalmente altruísta é posible grazas á colaboración entre a Deputación de Pontevedra, o Concello de Mos e a Unión Deportiva Mos.

Con esta iniciativa preténdese facilitar a práctica do fútbol aos cativos que non teñan claro que o fútbol é o seu deporte, ou a aquelas familias que non poden asumir o esforzo económico que supón asociarse a un club; en definitiva, para todos os nenos e nenas que queiran gozar da práctica futbolística e pertencer á Escola.

Aínda que as sesións de adestramento comezaron o día 6, o prazo de inscrición continuará indefinidamente aberto, posto que non existe límite de prazas. O teléfono de información e inscrición é o 606545219.

Os adestramentos realizaranse tódolos venres no Campo de Fútbol das Baloutas en horario de 17.00 horas a 18.30 horas.