A concellería de Participación Cidadá que dirixe a edil Kely Monzón organiza unha actividade de surf  para promover o ocio saudable entre os rapaces/as do municipio con idades comprendidas entre os 10 e os 17 anos.

No mes de xuño xa se realizara un curso de iniciación para os rapaces e as rapazas do Concello de Mos en idades comprendidas entre os 14 e 17 anos, e debido a boa acollida que tivo esta práctica e o grao de satisfacción dos participantes, renóvase a actividade lúdico-deportiva “SurfeaMos no Nadal”. O club deportivo Prado Surf escargarase da ensinanza teórica e práctica desta modalidade deportiva acuática.

O surf  é unha actividade que pode practicarse ó longo de todo o ano, xa que o traxe de neopreno co que se practica, evita que o corpo esté en contacto directo coa auga para non sentir as baixas temperaturas.

As sesións terán lugar os días 22, 24, 28 e 29 de decembro, dividiranse en dous grupos segundo o nivel dos participantes na práctica do surf. O tempo de duración será de dúas horas por cada día de actividade, e desenvolverase na praia de Patos, situada na localidade de Nigrán.

O desprazamento correrá por parte do Concello, coa contratación dun autobús para os participantes menores desta actividade, que sairá as 10.00 horas dende a Casa Consistorial.

O custe por participante será de 30 euros nos que se inclúen: dúas horas de clase cada día (teoría e práctica), todo o material necesario (táboa, neopreno e accesorios), docencia personalizada (máximo 6 alumnos/as por monitor/a), licenza federativa, seguro de Responsabilidade Civil e de accidentes, instalacións con acceso directo á area e duchas de auga quente, e monitores/as titulados pola Federación Galega de Surf.

O prazo de inscrición está aberto ata o 17 de decembro no Rexistro Xeral ou na oficina da OMIX do Concello de Mos, ou a través do correo electrónico: omix@concellomos.es. A lista de admitidos publicarase o 18 de decembro.