A alcaldesa de Mos, Nidia Arévalo, e a concelleira de Política Social, Sara Cebreiro, reuníronse onte en Santiago co novo conselleiro de Sanidade, Jesús Vázquez Almuíña, para tratar o tema da titularidade do Centro de Saúde do Rebullón e que esta sexa definitivamente asumida polo Sergas no que respecta ás competencias económicas. O conselleiro adquiriu coas representantes municipais o compromiso de intermediar neste tema que non depende directamente da consellería senón da FEGAMP (Federación Galega de Municipios e Provincias).

Dende o ano 2006 hai aprobado pola FEGAMP un convenio de cesión para que todos os Concellos que así o desexen poidan cederlle os seus centros de saúde á administración autonómica e que estes pasen a mans da consellería de Sanidade; tal é o caso que se atopa tramitando o Concello de Mos. Son varios os centros de saúde de municipios galegos os que aínda quedan por transferir e entre eles está o de Mos.

A titularidade patrimonial do inmoble fóralle xa cedida pola administración local mosense ó Servizo Galego de Saúde a finais do pasado ano 2014, sendo aprobada definitivamente dita cesión na sesión plenaria ordinaria do 27 de novembro, con certificación do acordo do Pleno en data 2 de decembro.

As representantes mosenses trasladáronlle hoxe ó conselleiro a urxencia do trámite de recepción definitiva das instalacións sanitarias de atención primaria por parte da administración autonómica, tendo en conta os últimos actos vandálicos e roubos rexistrados nas instalacións do Centro de Saúde e que  gravaron ás arcas municipais cun considerable gasto. Sucesos que continuaron a repetirse ó longo dos últimos días e cuxa investigación se atopa en mans da Garda Civil.

Tanto Arévalo como Cebreiro insisten na necesidade de que o Sergas se faga cargo do mantemento do Centro de Saúde de Mos, mantemento que actualmente recae sobre o Concello, que ten que asumir tódolos gastos derivados do combustible para a calefacción, electricidade, limpeza: tanto no que se refire á compra de productos como persoal adicado ás tarefas de limpeza, etc. A rexedora local e a edil de Política Social manifestáronlle a Vázquez Almuíña durante o encontro de hoxe o  seu interese en que a administración autonómica pase a asumir canto antes o mantemento do Centro de Saúde que anualmente lle costa ó Concello de Mos unha media de 50.000 euros.

A competencia do mantemento do Centro de Saúde leva sendo tema de debate dende fai tempo no Concello de Mos, pero agora parece que o procedemento aproxímase ó seu fin sendo unha realidade a cesión patrimonial do inmoble ó Sergas e o compromiso do conselleiro para intermediar neste tema intentando que quede zanxado de cara ó vindeiro ano 2016.

A preocupación e o interese do Concello de Mos son os de poder deixar canto antes de facer fronte ós gastos derivados do mantemento do Centro de Saúde e que estes pasen xa a mans da consellería de Sanidade, que é sobre quen debe recaer a responsabilidade do mesmo, xa que os Centros de Saúde son competencia de Sanidade; e este foi o sentir que lle trasladaron Arévalo e Cebreiro ó novo conselleiro durante a xuntanza desta tarde.

Hospital Álvaro Cunqueiro

As representantes municipais abordaron ademais con Vázquez Almuíña o tema do novo hospital Álvaro Cunqueiro, “que tamén nos preocupa porque é o hospital dos e das mosenses”, declarou Arévalo, quen comprobou, xunto co conselleiro de Sanidade, que o transporte interurbán ata o novo hospital está xa optimizado e en marcha, solucionadas as incidencias iniciais, e que o concerniente ó aparcadoiro está a tratalo persoalmente o conselleiro coa empresa, en aras de poñerlle solución en breve.

A alcaldesa mosense, Nidia Arévalo, xunto co resto do equipo de goberno local, visitará mañá pola tarde as instalacións do Álvaro Cunqueiro acompañando ó conselleiro Jesús Váquez Almuíña.