O Plan Concellos 2016, destinado a aqueles concellos da provincia con poboación de ata 50.000 habitantes, dótase dun importe fixo de 40 millóns de euros, 16 millóns máis que durante o ano anterior. Os concellos de Pontevedra e Vigo, por superar os 50.000 habitantes, non se beneficiarán do plan pero contarán con convenios propios para poder realizar os seus investimentos.

    
O procedemento de outorgamento das subvencións enmarcadas no Plan Concellos é o de réxime de concorrencia non competitiva, "desaparecendo a libre disposición dos recursos coa que contaba o ex presidente e mediante a cal, de forma arbitraria, caciquil e clientelar subvencionábase, por decisión unipersonal, ós concellos gobernados polo Partido Popular" segundo explican nun comunicado feito público polo organismo provincial.

"Elimínase a libre disposición que o anterior presidente empregaba como un instrumento de reparto arbitrario, clientelar e caciquil dos recursos públicos entre os seus municipios amigos, todos eles gobernados polo Partido Popular"

O Plan Concellos está dotado cun importe total de 40 millóns de € dos cales, 16 millóns se repartirán de forma lineal entre os concellos da provincia, de xeito que a cada un lle corresponde unha cantidade fixa de 266.666,67 €. A cantidade restante, 24 millóns de €, repartiranse atendendo a tres criterios: a poboación de cada concello (o 60%), a súa superficie (20%) e os seus núcleos de poboación (20%). Así, os concellos de menos de 10.000 habitantes contarán con 7,2 millóns de €, os que teñan entre 10.000 e 20.000 habitantes 9,6 millóns e os que conten con entre 20.000 e 50.000 habitantes recibirán 7,2 millóns de €.

Os concellos, que xa coñecen as cantidades que lle corresponden, poderán libremente determinar a elección dos investimentos e actuacións que desexen realizar atendendo ás seguintes liñas:

• Liña 1: Investimentos relacionados coas materias que os municipios han de exercer como competencias propias ou atribuídas por delegación, que poderán ser financiados na súa integridade pola Deputación ou cofinanciados entre o propio concello, a Deputación e/ou outra administración. Neste eido, non se subvencionan investimentos con orzamento inferior a 20.000 € (IVE engadido) agás subministracións que constitúan un investimento por si mesmas. A redacción dos proxectos deberá ser asumida polos concellos que, de non poder asumilo, terán que motivalo expresamente.

• Liña 2: Amortización, pagamento de débedas e gastos correntes. Nesta liña inclúense a amortización do endebedamento con entidades financieiras, o pagamento de débedas a acredores de investimentos, o pagamento de débedas a acredores de gastos correntes e o gasto corrente novo.

• Liña 3: Actividades culturais, deportivas, sociais, turísticas e actividades medioambientais. Nesta liña outórganse subvencións a actividades que realicen directamente os concellos, cun orzamento mínimo de 1.000 € (IVE engadido), que se realicen entre o 1 de xaneiro e 31 de decembro de 2016 e enmarquen nas seguientes: desenvolvemento cultural, educativo e social; no desenvolvemento e promoción do deporte na provincia; no desenvolvemento no ámbito social (paliar situacións de emerxencia social, mellora dos servizos sociais comunitarios, igualdade, axuda no fogar, loita contra a violencia de xénero, inclusión social, atención á dependencia, infancia e xuventude, maiores e calquera outra área ou sector dos servizos sociais); no desenvolvemento turístico do municipio, dos seus recursos turísticos e promoción así como no desenvolvemento e sensibilización medioambiental e educativo.

• Liña 4: Emprego para conservación e funcionamento de bens e servizos municipais. Esta liña permitirá subvencionar a contratación de persoas desempregadas, en réxime de xornada parcial ou completa segundo as necesidades dos concellos, para a prestación de servizos mínimos de competencia municipal entre o 1 de xaneiro e 31 de decembro de 2016. O número máximo de traballadores ven definido por criterios de poboación e así, os concellos con menos de 2.000 habitantes poderán contratar 14 traballadores, os que teñan entre 2001 e 5.000 ata 20, os que teñan entre 5001 e 10.000 ata 24, os que teñan entre 10.0001 e 20.000 ata 30 e os que teñan entre 20.001 e 50.000 ata 34.

As axudas comprenden o custo salarial e a cotización á seguridade social de persoas desempregadas. Para a selección dos traballadores daráselles preferencia (por este orde) ás vítimas de violencia de xénero, ós candidatos maiores de 45 anos, ós que formen familia monoparental con fillos ó seu cargo, ós que teñan niveis de renda máis baixa e ós que teñan cargas familiares.

Cada concello pode solicitar para a liña 1 desde un mínimo do 58,75%  ata o 100% da contía máxima que lle corresponda con cargo ó plan. Para as liñas 2, 3 e 4, cada concello poderá destinar unha porcentaxe máxima sobre a contía individual asignada de tal forma que na liña 2 poderá destinar un 15%, na liña 2 un 3,75%   e na liña 4 un 22,5% . No caso de que non se solicitase o 100% dos importes máximos destinadas ás liñas 2, 3, 4 o importe restante non concedido incrementará o importe dispoñible para conceder con cargo á liña de subvención 1 ata o límite máximo para o conxunto do plan. Sen embargo o importe da liña 1 non se poderá destinar ás liñas 2,3,4.

Os concellos interesados, deberán formular a súa solicitude, nos modelos normalizados que se facilitarán no rexistro xeral da Deputación de Pontevedra, na súa sede de Vigo, no servizo de cooperación ou na páxina web.