A concellería de Política Social e Cultura, dirixida pola edil Sara Cebreiro, con motivo da celebración, o día 25 de novembro, do Día Internacional contra a Violencia de Xénero, e co obxectivo de fomentar a igualdade entre sexos de cara a previr e erradicar calquera tipo de maltrato ás mulleres, organizou onte, domingo 29 de decembro, no Pavillón Óscar Pereiro unha clase colectiva de Zumba baixo o título “Móvete contra a Violencia”, dirixida a público de todas as idades e na que tamén participou a propia Cebreiro.

Esta animada proposta, organizada para que a veciñanza tomase conciencia en torno á grave lacra social que é a violencia de xénero, reuniu a trescentas persoas que, a parte de pasar unha xornada divertida, conseguiron transmitir a importante mensaxe de que a sociedade mosense en bloque rexeita calquera tipo de maltrato cara a muller, e que as vítimas endexamais estarán soas fronte ós agravios machistas.

Dende o Concello de Mos véñense realizando ao longo dos últimos anos numerosas e diferentes actividades encamiñadas á formación dos profesionais especializados neste ámbito, á prevención e á sensibilización social respecto da gravidade e magnitude do problema de violencia de xénero, entre outras iniciativas encamiñadas a previr e tentar erradicar esta lamentable realidade.