As políticas en materia de igualdade, cohesión social e xuventude son prioritarias para a Deputación de Pontevedra, segundo afirman nun comunicado no que engaden que "se ben o anterior goberno centraba as súas políticas sociais unicamente no Centro Príncipe Felipe, o novo goberno da institución provincial creou o servizo de igualdade e o de cohesión social e xuventude, coa finalidade de impulsar actuacións nestas materias que contribúan ó progreso da provincia de Pontevedra".

O novo goberno da Deputación de Pontevedra destinará, por tanto, preto de 800.000 € para o servizo de igualdade, anteriormente inexistente. A través deste departamento, a institución provincial porá en marcha políticas en materia de igualdade que sirvan como marco de referencia para a súa aplicación na administración local provincial. Terá, por tanto, funcións interdepartamentais, na propia Deputación de Pontevedra, pero tamén interinstitucionais, de ámbito provincial.

O servizo de cohesión social e xuventude conta cun orzamento de 5 millóns de €

Fronte á política da Xunta de Galicia, que está acernando os recursos dedicados á igualdade, ou  do Goberno central, que desde o 2011 acumula un recorte do 37% en políticas de igualdade, ó que hai que sumar o recorte do 17% sufrido, nesta lexislatura, no orzamento destinado á loita contra a violencia de xénero, a Deputación de Pontevedra crea un servizo propio en materia de igualdade, inexistente ata o momento, ó que dota de preto de 800.000 €.

A maiores, a institución provincial destina máis de 5 millóns de € ó servizo de cohesión social e xuventude que centrará a súa actuación no impulso dos servizos sociais municipais e na aposta pola xuventude. Neste contexto, destinaranse case 3 millóns de € á prestación de servizos comunitarios básicos nos concellos, coa finalidade de garantir a atención das necesidades sociais de toda a poboación, previr a desigualdade entre a cidadanía  así como favorecer a participación e libre desenvolvemento das persoas.

A institución provincial investirá 10,4 millóns de € no funcionamento do Centro Príncipe Felipe

En canto á xuventude, a Deputación de Pontevedra destinará máis dun millón de € para este sector da poboación, o futuro da nosa sociedade, que na actualidade é vítima da situación precaria do noso país. Para elo, a institución provincial está a escoitar as súas necesidades coa finalidade de impulsar medidas e actuacións que sexan do seu interese.

Ademais, o novo goberno da Deputación de Pontevedra destinará un millón de euros ós colectivos sociais e entidades de iniciativa social da provincia, repartidos de xeito xusto e igualitario, e investirá 10,4 millóns de € no funcionamento do Centro Príncipe Felipe.